A si podet? Naschet S’Indipendente

Leghe cust’artìculu in: alguerésgadduresuitalianotabarchin turritanu.

S’Indipendente est su blog de informatzione nàschidu e sustentadu dae Assemblea Natzionale Sarda.

Non faghet a faeddare de democratzia sena tènnere contu de su deretu a sa lìbera espressione de opiniones e a sa crìtica.

Pro custu, in su respetu de sa pluralidade chi distinghet sa sotziedade e sa matessi Assemblea Natzionale Sarda, is sòtzios de ANS – e chie si siat chi ddu disìgiet – ant a pòdere espressare liberamente pro mèdiu de custu blog s’opinione issoro subra temas chi pertocant sa cultura, s’istòria, sa polìtica de sa Sardigna, s’autodeterminatzione de is pòpulos e s’autoguvernu, cun s’obietivu de pònnere a connoschimentu de is letores puntos de bista diversos subra temàticas chi fitianu sunt ismentigadas dae sa dibata in is mèdia e tzucare unu cunfrontu a pitzu de sa chistione sarda in cada aspetu suo.

Chie tesset sa trama de custu blog sunt voluntàrios, una “redatzione” chi si ispirat a is 13 printzìpios de s’Assemblea Natzionale Sarda e chi at a faeddare totus is lìnguas de Sardigna.

Si presentat cun a palas un’importante carta de balores, sa cale at a costituire su riferimentu prìntzipe pro sa regorta, sa chèrrida e sa redatzione de is informatziones.

S’at a impinnare pro promòvere sa libertade de espressione, semper reconnoschende sa responsabilidade individuale pro su chi pertocat su càbidu de is artìculos.

At a difùndere esclusivamente informatziones, documentos, immàgines o àudios de is cales connoscat sa fonte e no at a permìtere pro perunu motivu sa deformatzione de testos, documentos, immàgines, àudios e de opiniones espressadas dae àtere.

No at a impreare mai mèdios isleales pro regòllere informatziones e/o materiale e at a retificare ònnia informatzione chi at a isvelare faddinas.

S’at a impinnare finamentas pro respetare semper sa dignidade de is persones e sa vida privada issoro e no at a atzetare riferimentos sessistas o xenòfobos in is testos, in is immàgines e in is documentos àudio.  

In s’impreare testos, immàgines o documentos àudio pertocantes gherras, atos terroristicos, disauras o catàstrofes, at a respetare is làcanas de su riguardu chi si depet a sa tribulia de is vìtimas e de is persones a issas bighinas.

No at a atzetare avantàgios o promìssas chi diant pòdere limitare s’indipendèntzia sua.

S’Indipendente at a èssere unu trastu de diàlogu subra sa libertade, s’isvilupu econòmicu e tzivile, su benèssere e sa salude de su pòpulu sardu, abertu a sa partetzipatzione de totus.

Leghe cust’artìculu in: alguerésgadduresuitalianotabarchin turritanu.

Cumpartzi • Condividi

Lascia un commento / Cummenta

Il tuo indirizzo email non sarà pubblicato. I campi obbligatori sono contrassegnati *

Captcha in caricamento...