Pro su Sardu! (Ma semper in italianu) 

de Marco Piras

So torradu pagas dies a oe de unu atopu de ativistas de lìnguas minorizadas in Euskal Herria, in sa tzitade de Gasteiz, ma apo tentu sa sorte di bìere finas sa tzitade de Bilbo e una bidda pitichedda in sa Navarra.  

Cosas medas m’ant ispantadu de cussa terra, ma una prus de àteras chi est acapiada a sa temàtica de sa lìngua m’at dadu meda de pensare: totu su chi pertocat sa polìtica est iscritu in sa lìngua issoro, su bascu, totu!  Chi siant manifestos, boladoreddos, iscritas in is muros. E sena nimancu unu faeddu in castillianu.  

Calincunu diat pensare chi est aici ca su bascu dd’allegant giai totus, ma no: ddoe at gente meda chi ddu faeddat pagu e nudda. Chie iscriet ddu faghet in bascu ca a iscrìere in bascu est unu isseberu polìticu, est a ammostrare a chie ses, est a gherrare pro sa lìngua tua.  

In Euskal Herria est unu isseberu polìticu a iscrìere totu in bascu, e in Sardigna est unu isseberu polìticu a iscrìere e faeddare in sardu o in italianu. Prus che totu cando una persona o una organizatzione tenet una responsabilidade polìtica: cando est o rapresentat unu partidu o unu assòtziu, cando est intro de is istitutziones, cando faeddat cara a personas medas. 

Sa prus parte manna de partidos e assòtzios indipendentistas sardos, si prenent sa buca de slogan chi nosi narant cantu siat de importu sa lìngua sarda pro issos, narant chi tocat a dda faeddare e a dda fàghere bìvere etc.  

Ma poi de chi andamus a bìere su chi iscrient in is comunicados e in is arretzas sotziales, chi andamus a iscurtare una debata pùblica, no agatamus e no iscurtamus giai mancu unu faeddu in sardu, francu su nùmene de s’organizatzione issoro o carchi slogan – mancari  sa prus parte de issos faeddent e cumprendant su sardu. 

S’iscusa est giai semper sa matessi “eh ma tanti non ci capiscono”.  Paret chi abetent a unu benidore indefinidu in ue totu is sardos ant a torrare a faeddare sa lìngua cosa nostra, unu benidore chi non at a arribare mai chi sighimus a impreare semper s’italianu.  

In prus a nàrrere “tanti non ci capiscono” est fàula manna: sa prus parte de is sardos, mancari non ddu faeddent bene o non costument a ddu faeddare in su fitianu, podent cumprèndere su sardu.  

E poi chie diat dèpere èssere a imperare sa lìngua, si non chie cheret una Sardigna indipendente, chie narat de gherrare pro chi sa lìngua non morrat? A non ddu impreare mai est unu isseberu polìticu ebbia, est unu issebereu chi agiudat sa lìngua italiana a bochire sa lìngua sarda e cun issa su pòpulu sardu. Ca non ddoe at pòpulu sardu sena de lìngua sarda. 

A faeddare e iscrìere DE lingua sarda sena de faeddare e iscrìere IN lìngua sarda non tenet sentidu perunu, est comente de faeddare de una istàtua de unu museo chi si depet tutelare, mancari finas “valorizare”, ma est e abarrat comente dda bidimus palas de sa bidriera in su museu: firma e sena de vida. 

Imàgini: Marco Piras