Le foto dei cartelli pubblicitari e dei camion-vela raffiguranti slogan contro l’aborto mostrano che ancora oggi c’è chi si oppone a un altrui diritto garantito dalla legge. In questo articolo, Luana Farina Martinelli di Caminera Noa sottolinea l’importanza dell’esercizio dell’autocoscienza al fine dell’autodeterminazione interna ed esterna.
de Luana Farina Martinelli
Est frisca sa notìtzia chi pro sas carreras de carchi tzitade sarda sunt a giru càmions-vela de unu movimentu chi tirat a de-legitimare su deretu a s’istrumadura voluntària, decretadu pro lege.
Dae cussu a tesu (ma non meda) 22 de Maju de su 1978, annu in su cale a sa fine est istada aprovada sa L.194 “lege pro sa tutela sotziale de sa maternidade e subra s’interrutzione voluntària de sa gravidàntzia”, non b’est istadu deghènniu in su cale, pro contu de gente, movimentos religiosos e partidos polìticos, non si siat chircadu de trassare subra su deretu de sas fèminas a s’autodeterminare fintzas in su sèberu de sa maternidade. Gente chi at semper faeddadu, o mègius, faeddadu chena critèriu perunu, pro nara·nara, pro islogan, presoneris de una serradura mentale e farta de sensu de democratzia.
Però non si sunt mai espressados cunforma a s’esperièntzia personale, una de sas prus drammàticas chi una fèmina potzat bìvere, chi in niunu casu s’afrontat cun lebiesa, e chi lassat unu sinnu chi non si podet cantzellare, una tzicatritze chi no est solu in su corpus, chi non s’at a sanare a lestru e chi, notìtzias che a custa de eris, faghent a manera chi si torret a abèrrere semper.
Deo imbetzes isco de ite seo faeddende. In su tempus est istadu impreadu calechisiat mesu pro chircare de sutràere a sa democratzia unu deretu balangiadu, non solu faeddende in manera metafòrica, cun làgrimas e sàmbene! Sàmbene meda ghetadu dae milli e milli fèminas chi pro sèculos sunt mortas suta pràticas illìtzitas fatas dae personàgios lebreriscos, ambìguos, losas illatadas de biancu, ipòcritas, sena iscrùpulos e ètica chi, in privadu e a pagamentu, ant praticadu s’istrumadura clandestina, mescamente a sas fèminas de cunditzione sotziale prus dèbile.
Deo a cussu tempus tenia 21 annos, e apo fatu sas lutas, e apo votadu a favore de cussu deretu sacrosantu, chi però, tando, pro mene fiat unu fàghere iscollegadu de su totu dae sa cussèntzia achirida deghinas meda de annos a pustis – ma non est mai tropu a tardu! Faeddo de una cussèntzia chi est finas polìtica: s’auto-determinatzione che a èssere umanu, che a fèmina, che a sarda chi faghet polìtica!
Sa possibilidade de seberare libera-mente su pròpiu sistema de guvernu (auto-determinatzione interna) e de èssere lìberos dae ogni dominatzione esterna, in piessigna dae su domìniu coloniale (auto-determinatzione esterna), non podet prescìndere dae su passàgiu netzessàriu, pro fèminas e òmines, de s’auto-determinare in primis che a persones, intro de sa famìlia de orìgine e de sa comunidade de apartenèntzia, in totu sas isferas de atzione: sentimentale, amigale, de traballu, educativa e polìtica.
Pro mene chi seo feminista, su trastu fiat tando, e restat semper, s’esertzìtziu “de s’auto-cussèntzia”: sa cussèntzia, teòrica e pràtica, de sese matessi chi sa persone depet segudare.
Custu est su coladòrgiu netzessàriu chi medas, mescamente òmines, comunistas, indipendentistas, lìberos pensadores chi si definint progressistas, puru decrarende·si pro s’auto-determinatzione, fìsica, mentale, culturale e polìtica, ant brincadu e sighint a brincare (e si bident sos resurtados!).
So cumbìnta chi petzi cun su passàgiu indispensàbile de s’auto-cussèntzia si potzat arribbare a beru a unu sèberu lìberu de su destinu, de su pròpiu e de sos àteros.
Oe comente a tando naro nono a sa mortes, a s’istrumadura solu pro fèminas privilegiadas e a su dennegu de unu deretu otèntu pro totus sas feminas. E naro emmo a s’auto-determinatzione de su corpus e de sa mente de sas fèminas e de sos òmines de Sardigna.
Foto de presentada: CS18 feb 2021
