Como est su momentu de su dolu. Unu dolu mannu e malu. Non benit bene a nàrrere chie fiat, chie est! Bachis Bandinu, cando su coro est prenu de tristura e su cherbeddu peleat pro elaborare unu datu de fatu goi feu. Epuru, tocat de atzapare su coràgiu e nàrrere nessi cuddas pagas cosas chi benint a sa mente a sa sola, pensende a un’òmine che a issu.
L’ant a mentovare in ammentos e decraratziones de cundolèntzia fintzas gente chi fiat a un’àtera banda, in sensu polìticu, morale, intelletuale. Ca Bachis Bandinu sa banda inube abarrare l’aiat seberada dae meda. Bachis Bandinu no est de totus. Est de chie l’at letu e ascurtau, e non petzi letu e ascurtau ma fintzas cumpresu. Chie at postu fatu a sos passos suos. Chi fiant lèbios a subra de sa terra non pro su pagu pesu de sa figura sua, ma pro sa manera rispetosa, generosa de si mòvere in su spàtziu pùblicu sardu.
Meda gente chi in custas dies at a chistionare de issu rapresentat su chi issu at cuntrastau totu sa bida. Ca issu non fiat unu intelletuale orgànicu a sos grustos de podèriu o a sas cricas corporativas de s’acadèmia sarda, de sos mass media, de sa “cultura di sinistra” (in italianu, est pretzisu) e de s’ambiente culturale sardu auto-colonizau e, a lu castiare bene bene, anti-sardu.
Su chi at iscritu e naradu Bachis Bandinu abarrat cun nois e abarrat bivu. Prus chi tzelebrare a issu, pro li torrare onore e reconnoschèntzia, diat èssere mègius meda a sighire su caminu suo, su caminu de sa cunsèntzia, de su ischire chie semus e inue semus postos in su tempus e in su spàtziu. Chena cumplessos de inferioridade, chena megalomanias tontas, cun sa boluntade de fàere e de fàere paris pro unu bene chi andat prus a largu meda de sos egoismos e de sos personalismos.
Adiosu, Babbu mannu de sa Sardigna.
Immagine: ifold.it
I commenti saranno sottoposti ad approvazione prima della pubblicazione.
Gratzia meda a Omar Onnis
Appu fattu sa matessi arrexonada. Est meda sa genti chi iscridi sentimentus de importu mannu po Bachis. Et poita, mi pregontu, eus aspettau a morri, po totu qusta riconoscientzia? Poita, totus impari, no eus sighiu su camminu de libertadi de su populu sardu, chi Bachis iada cumprendiu e segnau? Et ita adessi “il maleficio”, sa cundanna nosta, a essi sempri agoa e mai ainnatis? Siguru ca, a Babbu Mannu mortu, funti in medas a iscriri po dolu mannu, ma fintzas cun sa cuscientzia ca s’occasioni est bona, po chistionai de issus e totu… po no andai ainnantis. Bachisio Bandinu elargisce lustro anche da morto. Ma no tocat sempri a pensai mali. Deu creu ca qustu luttu, in calancunu modu, possada serbiri a s’incanalai in unu processu nou.