Da calch’e chita, cu’ la Cunsulta Intercumunali Gaddura, Sardware e ANS Assemblea Natzionale Sarda aemu incuminciatu a trabaddà innantu a un pruggjettu didicatu a la prisènzia di lu gaddurésu e di l’alti linghi di Saldigna illu mundu digitali, fraichendi lu Wikimedia Incubator, impignèndici pa’ cilcà di fà divintà internet un lócu chi sempri di più rispèttia la divessitai linguística.
Pa’ splicà da undi è nata chista nizissitai (chi illu casu di Sardware e ANS s’è manifistata da abbeddu tempu, sendi la primma associazioni chi traduci applicazioni in saldu la primma e l’unicu situ plurilinghi chi v’è in Saldigna lu sigundu), femu unu spirimentu mintali semplici. Piddemu una linga, una cassisia, e cilchemu d’immaggjinalla senza internet. Senza post, senza vídio, senza imbasciati innantu a WhatsApp, senza una pàgina Wikipedia, senza un altícculu autu illi risultati di Google fendi una cilca. Dapói dummandèmuci: chidda linga esisti pa’ tuttu lu mundu? Cosa càmbia pa’ li passoni chi la faéddani?
No dicu chi internet sia un lócu più impultanti di l’alti, ma no si pó nicà chi sia oramai divintatu lu dumíniu prinzippali undi li linghi cunchístani o pàldini visibbilitai, credibbilitai accadémica (pinsemu a unu stúdiu linghísticu scrittu in inglésu contr’a unu stúdiu scrittu in napoletanu), prisènzia púbblica e ancóra, gja si sa, chissu appeal utilitarísticu chi faci ‘iné o mancu gana a una passona di studià e cunniscí chissa linga. Comu à documentatu Jannis Androutsopoulos illu trabaddu sóju innantu a la mediatizzazioni e lu cambiamentu sociulinguísticu, li prucessi di digitalizzazioni tòrrani a definì li cuntesti undi li linghi so liggjittimati, e chiddi undi invecci no, e difatti scumpàrini. Una linga chi no appari online è una linga chi vali di mancu, ancora pal ca la faédda dugna dí.
Prublemi tècnichi, semu próppiu siguri chi sia sólu chissu lu prublema?
Candu si faédda di linghi minorizzati e mundu digitali, v’è la tindènzia a pinsà sùbitu sólu a li strobbi tècnichi: mancànzia di correttori oltugràfichi (pa’ lu saldu lu prublema è suparatu), assènzia di intelfacci, tastéri no adatti. Chisti prublemi esístini, ma no so lu nódu prinzipali. L’aia gja dimustratu lu stúdiu cundottu illu cuntestu di lu Digital Language Diversity Project, un pruggjettu europeu Erasmus+ che à analizzatu lu cumpultamentu digitali di li faiddadóri di cattru linghi minoritarii europei: bascu, bretoni, saldu e carelianu.
Pa’ lu saldu, la cilca à cuinvoltu guasi 600 faiddadóri e li risultati so istruttivi: l’85% di l’intalvistati dici di trattà la linga in internet, e lu 72% lu tratta pal cumunicà cun chat, missaggji, email. In Facebook esìstini 143 gruppi e pàggini in saldu chi li passoni visitiggjani in manéra fittiana. Lu disíciu di trattà la linga in tutti l’àmbiti di la ‘ita, puru illu digitali, è espressu in manéra cjara. Maccari tuttu chistu, candu si dummanda palchí lu 15% no la tratta online, li risposti no tòccani la tecnologia, ma la timènzia di non sapéllu scriì bastanti be’, l’idea chi lu saldu sia una linga di faiddà e no pa’ scriì, la mancànzia d’unu standard cunnottu da li passoni e intratu illa ‘ita sója (chist’últimu saria di cumprindí messi, sendi chi la LSC è sempri a dispunimentu di li passoni ma no s’impara in iscóla) . No è chistioni, tandu, sólu di strumenti, ma una chistioni psiculógica, sociali, educativa, passunali e collettiva.
La gjiralchia chi ci pultemu infattu
Pierre Bourdieu aia ingjittatu chistu meccanismu gja ill’anni ’80, primma chi esistisi internet, pa’ lu chi tocca lu capitali simbólicu e la gjiralchia linghìstica. Li linghi, scriia, no s’agàttani mai in una situazioni di paritai: esisti un malcatu linguísticu undi celti varietai so sintiti com’e chi àggjini un’autoritai e chi síani adatti all’impréu púbblicu, e alti no. Ca faédda la varietai subuldinata à la tindènzia a tiné in pédi chidda gjiralchia ancora primma chi calch’e un_ vi la sia impunendi, e anda a cumprì chi tratta la linga sója sólu illu cuntestu priatu, illu faiddatu, in celti cuntesti, e pa’esprimì una celta calitai di pinséri.
Illu cuntestu digitali, chistu si traduci in una folma specìfica di cagliamentu: lu faiddadóri saldu, gaddurésu, bretoni chi próa disàgiu primma di scriì illa linga sója in un post pùbblicu non è timendi un gjiudíziu di fóra palésu. Ma è spirimintendi unu stigma intiriorizzatu, la cunvinzioni muta e spalta chi faiddà chissa linga sia un indigadóri di calch’e cosa.
Li dati di lu DLDP dàcini cunfelma: lu stigma innantu a la linga no l’ammittini guasi mai che mutiu di no-impréu di la linga. Eppuru è pròppiu chissu chi umbè di ‘olti ci blocca.
Presenza come sopravvivenza
Illu 1977, Howard Giles, Richard Bourhis e Donald Taylor pruppunisini la tiuria di la vitalitai etno-linghistica, chi idintificaa illa prisènzia ili media unu di l’indicadóri fundamintali di la risistènzia di una cumunitai linghística illu tempu. Una linga chi s’agatta illi media, puru digitali, manda un signu di vitalitai; una linga chi manca ingjitta mancànzia di risistènzia e tempu ‘enidóri scrittu.
Claudia Soria, chi ha sigutu la palti di lu pruggjettu DLDP chi studiaa lu cumpultamentu di li faiddadóri di linga salda, l’à cjarutu illu State of the Internet’s Languages Report: la mancànzia digitali d’una linga no è neutra. Torra a malcà e raffolza li gjiralchii gja prisenti tra linghi uffiziali e linghi no uffiziali. E aggiugnì un datu impultanti di mustrà: illu 2012, una cilca di lu network META-NET aia mustratu comu 29 linghi europei fùssini rischiendi la scumpalsa digitali pa’ la mancànzia di tecnologii linghìstichi nizissari: chi no tocca tandu sólu li linghi minorizzati, no uffiziali, ma ancóra li chi semplicementi no réscini a occupà un lócu illu dumíniu digitali.
Cosa dici lu Cunsiddu d’Europa
Illu malzu di lu 2026, lu Cumitatu direttivu pa’ l’antidiscriminazioni, la divessitai e l’inclusioni di lu Cunsiddu d’Europa (CDADI) à pubblicatu unu stùdiu fulmali innantu a li pràttichi affattenti pa’ la prutizioni di li linghi riggjunali e minorizzati illi paési membri (CM,2025). Lu capítulu didicatu a li folmi nói di media faédda cjaru: li social media e li media digitali ani di divintà boni a accidì pa’ tutti l’utenti di linghi riggjunali e minorizzati di tutti li gjinirazioni e li cuntinuti in chisti linghi ani di pudé raggiugnì l’utenti putinziali senza strobbu. No sólu dunca pa’ li ca li cilca in manéra attiva. Lu stúdiu raccumanda dapói di fà criscì figuri capazzi di pruducì cuntinuti illi linghi minorizzati illi social, di fraicà materiali digitali specìfichi, e di trabaddà cu’ li piattafolmi tecnulògichi pa’ smannà l’accessu a chisti cuntinuti pal mezu di l’algoritmi. Una raccomandazioni fulmali di lu Cumitatu di li Ministri di lu Cunsiddu d’Europa, riolta a li Stati.
Saria a dì chi pubblicà cuntinuti in gaddurésu, in saldu, in brètuni, in cassisia alta linga minorizzata no è sólu un gjestu “identitàriu”, ma è un attu chi si inséri in un cuadru di diritti cunnotti a livélllu Europeu e intelnaziunali.
Cosa rispundí a ca dummanda palchí scrií illa linga tója invecci chi in una linga duminanti
Lu primma muttiu è la nolmalizzazioni: dugna post/altìcculu/situ in una linga minorizzata fiacca l’associazioni incónscia tra chissa linga e lu passatu, lu folklore, lu cuntestu cjusu. La rendi adatta a dugna tempu, capazzi di faiddà di cosi nói, d’esse irónica, prizzisa, pulìttica, puèttica, gjulnalìstica, istituziunali e accadémica.
Lu sigunda muttiu è l’imparu: ca cunnosci in manéra passiva la linga la ‘idi in cuntesti infulmali e fittiani, e chistu ni raffolza l’impréu in sensu attivu, ed è pròppiu l’input chi polta una passona a raffulzà la stima illi cunfronti di la linga.
La di tre è la documentazioni, è respunsabilitai: dugna testu scrittu online è corpus, è traccia, è materiali pa’ ca studiiggja e trabadda innantu a chissa linga, pa’ aé dati utilosi pa’ lu fraicu di AI e d’alti aimini chi poni silvì a la cumunitai di faiddadori (chici un altìculu intarissanti di l’Unione de sos Comunes de su Monte Arvu chi ni faédda a fundu).
La di cattru, fossi la più impultanti, è la ligjittimazioni: vidé la linga sója in unu spàziu pùbblicu dici a ca faédda chista linga, a cal’è smannendi illa socetai d’óggji chi la linga vali, è adatta a dugna cuntestu, e chi no v’è di valgugnassi pa’ no sapé scriì ancora in manéra palfetta.
No selvi esse palfetti ma studià li réguli e cilcà d’imparalli a pocu a pocu è impultanti. E selvi di sfraicà li stigmi chi aemu abbracciatu e imparatu illu tempu, e turrà a scriì insembi li réguli sociali d’impréu di li linghi nóstri.
Riferimenti
Imàgini: magnific.com
